Covid-19 Tilkynning

Sunnudagssamkomur frá og með 28. febrúar.
 
Núgildandi samkomutakmarkanir eru þannig að 200 manns mega koma saman við trúarathafnir svo lengi sem skráð er nafn, kennitala og símanúmer allra viðstaddra ef upp skyldi koma smit. Við komu í kirkju verður þess vegna óskað eftir þessum upplýsingum og þær skráðar niður.  Grímuskylda er allan tímann og fjarlægðarmörk milli ótengdra aðila eru einn metri. 

Til þess að allt gangi vel fyrir sig biðjum við alla um að lesa vel eftirfarandi reglur sem munu gilda vegna opnunarinnar.

Við hvetjum þá sem eru í áhættuhópi til að meta vandlega hvort tímabært sé að mæta og eins biðjum við alla þá sem finna fyrir flensueinkennum að halda sig heima við.
 
Önnur hver röð verður opin og fólk sem er ekki í nánum tengslum þarf að hafa hæfilegt bil sín á milli miðað við reglurnar. Þegar komið er í aðalsalinn biðjum við fólk um að ganga til hægri, velja þá röð sem það vill sitja í og ganga eins langt inn í þá röð og það kemst, annaðhvort í sæti við hlið einhvers sem það er í nánum tengslum við eða hafa hæfilegt bil á milli ef aðilar eru ekki í nánum tengslum. Þetta er gert til þess að sætin nýtist sem best, sem flestir komist að og til þess að fólki þurfi ekki að klöngrast framhjá þeim sem eru þegar sestir.
 
Ef mögulegt er þá biðjum við fólk sem er í nánum tengslum að mæta saman til kirkju og sitja saman. Þannig er mögulegt að við komum sem flestum fyrir. Þeir sem mæta einir til kirkju eru beðnir um að setjast upp á svalir eða inn í hliðarsal af því að þar eru lausir stólar og því auðvelt að raða þannig að plássið nýtist sem best.
 
Við gerum ráð fyrir að um 160 einstaklingar fæddir fyrir 2005 komist fyrir í salnum með þessu fyrirkomulagi auk þeirra sem þjóna á sviði og tæknifólks. Börn fædd 2005 eða síðar eru ekki talin með þar sem reglurnar gilda ekki um þau. Þegar og ef fullt verður í salnum bjóðum við upp á útsendingu á skjá í kaffisalnum á miðhæð kirkjunnar þar sem allt að 60 manns komast fyrir með eins metra millibili. Ef kaffisalurinn fyllist líka gæti komið upp sú leiða staða að við þyrftum að vísa fólki frá.
 
Við viljum gera allt til þess að sem flestir geti notið þess að koma á samkomu um leið og við ítrekum mikilvægi þess að virða sóttvarnarreglur. Við hvetjum fólk til að mæta með sínar grímur. 
 
Að sjálfsögðu verða áfram beinar útsendingar á netinu fyrir þá sem kjósa eða þurfa að vera heima auk þess sem samkomunni er útvarpað á Lindinni.

Þú ert velkomin

Hvar sem þú ert á göngu lífsins
þá skiptir þú máli og líf þitt hefur tilgang.
Í Fíladelfíu viljum við gjarnan hjálpa til við
að fá svör við þeim spurningum sem þú hefur
um lífið og trúna.

Instagram Fíladelfíu